Porto captain hlui Costa a thi

Kum 2004-a FC Porto-in ropui taka Jose Mourinho hoa Champions League nomawi an chawi ṭuma captain, Jorge Costa chu lungphu chawlin a thi a, kum 53 mi a ni.

Portugal tana vawi 50 inlan thei midfielder hian Porto tan a ṭhat lai hun zawng zawng a hmang tiin a sawi theih a, hei bakah hian an ram club Penafiel leh Marítimo bakah a hun laia Premier League club Charlton Athletic-ah loan-in a khel hman a, Belgian club Standard Liege-ah season khat khelin, a club hnuhnung ber a ni bawk.

Costa hian Porto tan nomawi 24 zet chawiin, Primeira Liga-ah vawi riat a champion pui a, Champions League leh UEFA Cup-ah champion nomawi a chawipui bawk - season hmasa khan Porto-ah hian director of professional football niin a kir a, a thihna hmun pawh hi Porto club training centre a ni.

Portuguese centre back hlui hi nikuma Porto-a a kir hma hian club 16 zetah a thawk kual hman a, Indian Super League club Mumbai City pawh 2018-2020 inkar kha a lo enkawl tawh.