Sesko-a'n United a pan dawn

Manchester United chuan RB Leipzig striker Benjamin Sesko chu an la lut ngei dawn niin a lang ta a, mimal thilah inremna nei tawhin, June 2030 thleng atan contract a ziak ang.

Newcastle United pawhin Sesko hi lakluh tumin an lo dawr tawh a, euro maktaduai 75 bakah, a khelh ṭhat dan a zira €5mtd pek belh tura an dawrna chu Leipzig hian an hnar.

Leipzig-in Magpies an hnar hnuah Eddie Howe-a team hian €82.5mtd bakah €2.5mtd pek belh turin an dawr nawn a, German club hian an pawm. Mahse, a tira a zawm duh lam tichiang lo Sesko-a'n United zawm a duh thu a lo hrilh.

Hetihlai hian United an lang ve leh a, Red Devils hian €75mtd bakah €10mtd pek belh turin Leipzig an dawr. German club hian United dawrna hi an pawm a nih chuan Sesko hi Old Trafford lamah a kal zui ang.

Kum 22 mi Sesko hian kum 2023 khan Leipzig hi a zawm a, German club tan hian inelna hrang hrangah match 87 khelin goal 39 a khung a, assist vawi riat a nei bawk.