LBS Suzuki CYMA Futsal Zanin dar 7:00-ah Electric Veng Vs Durtlang

Central YMA leh MFA buatsaih 1st Inter Branch YMA Futsal Tournament-ah vawiin aṭangin last 32 khelh ṭan a ni dawn a, zanin dar 7:00-ah Electric Veng leh Durtlang an inkhel ang. Inelna hi R. Dengṭhuama Stadium, Mualpuiah khelh niin a hmuna inkhel en man hi Rs 50 a ni a, Central YMA YouTube-ah live-a pekchhuah a ni bawk.

Vawiin inkhel turah en châkawm bik a awm nual a, match hmasa ber Lalruatliana Sailo (Tawia) enkawl Chawlhhmun leh Lalrozama Fanai enkawl Bawngkawn a hmuhnawm nghal dawn. Sakawrtuichhun leh Zemabawk North pawh chak tur hriatthiam a har.

Futsal a nih chuan Muthi an ṭha a, an khingpui tur Luangmual dah hniam a rem chuang lo. Tlungvel Vengtharin Zarkawt an ngam viau a, team ṭha zawk hret tur Durtlang North an hmachhawn leh dawn.

Nursery Vengin futsal khelh dan hmang an thiam a, Mission Vengthlang an duai bik lo, intiat tawk tura ngaih an ni. Republic Veng leh Zonuam hi en châkawm ber dawttu a ni thei ang a, Zonuam hi MFA buatsaih Inter Village Futsal champion laiin Republic Veng hi CYMA Football champion zo hlim an ni thung.

Tlangnuam West leh Kanan pawh inkhel tawk viau tura ngaih a ni a, ISL player Freddy Lallawmawma awmna Kanan an buk a rit zawk ang. En châkawm ber tur Durtlang leh Electric Veng ten an tawp an khar dawn a, final-a intum atan pawh an awh awm hle.

Electric Veng hi futsal khel thiam an ni a, hall an neih ṭhat avangin training pawh an nei ṭha. Lalhlimpuia (Tata) hote hian futsal game tak tak an khel chhuak thei a, Aibawk 11-0 a an sawp hnuin Ramhlun North 7-2 in an sawp. Player pakhatah an innghat lo a, team game an khelh bawk.

Durtlang hian MFA buatsaih Inter Village Futsal-ah final an thleng thei a, tun ṭum inelnaah Kulikawn (5-2) leh Republic Vengthlang (9-2) in an sawp. Anni erawh mimal ṭhatna hmachhuan thei tur an ni a; Hmingthanmawia leh Lalfelkima te an pawimawh leh dawn a, Lalmuanzova thahruai a pawimawh viau bawk.

R. Dengṭhuama Hall a zau ṭha a, hei hi team anga ṭha lo zawk Durtlang hmachhuan tur a ni thei ang. A tu zawk pawh tla thei an ni a, an intluk tawk em avangin inkhel entuten danglamna an thlen thei ang.