Asia Cup-ah SKY a captain dawn

BCCI chuan Asia Cup 2025-a India captain turin Suryakumar Yadav an ruat. Tun ṭum Asia Cup hi T20 hmanga inelna a ni a, September 9-28, 2025 chhung hian United Arab Emirates-ah khelh a ni ang.

Group A-ah India, Pakistan, Oman leh United Arab Emirates te an awm ang a, group B-ah Afghanistan, Bangladesh, Hong Kong leh Sri Lanka te an awm thung. Group khat aṭangin team hnih ve ve Super Four khel turin an tling dawn a, Super Four-ah pawh team pali hi an inkhel chhuak leh vek ang.

Final hi September 28, Pathianni hian Dubai International Cricket Stadium-ah khelh a ni ang. Asia Cup-a ngaihven hlawh ber tur chu India leh Pakistan inkhel a ni dawn a, ram inhal tak pahnih hi September 14, Pathianni zan dar 7:30 hian an inkhel dawn.

India hian England-ah Test series an khel zo chiah a, Asia Cup atan inbuatsaihna an nei chhunzawm ang. Asia Cup zawh hian West Indies nen Test match vawi hnih an khel ang a, chumi zawhah T20 leh ODI khel turin Australia an tlawh ang.