Sanga enkawl Saikhamakawn

Lalsangzuala Hmarin Saikhamakawn a enkawl dawn tih a chian khan MPL club thar ṭha tak an awm belh dawn tih a hriat theih a, I Day Football-ah a dikna hmuhin a awm.

Tualchhung football-a hming langsar lo Saikhamakawnin MPL club lilamna aṭanga inlei tlingin team thar ṭha tak an din. I Day Football-ah Saikhamakawn hian MPL club MLS chu 6-0 in an sawp a, I League club Aizawl FC nen goal awm loin an inhnehtawk.

Goal difference hmangin Saikhamakawn hi Aizawl FC chungah an awm a, I League club chunga awm hrim hrim hi an veng tan chhinchhiahtlak a ni.

Sanga'n hming langsar si lo, player ṭha tho si a khawn khawm a, chung zingah chuan Suanngaihmuana leh Lalnunzira Sailo te an tel. Amuana hi Mizo striker hmabak nei êng ber zinga mi a ni a, khup na avanga season khat chuang a chawl tawh. Tunah a dam tawh a, a dam ṭhat theih phawt chuan MPL12-ah pawh player langsar a ni pha ang.