Goal bawh nâ Chanmari

I League club Chanmari FC-in training ṭan har hma mah se Rochhingpuia hoin bul an ṭan ṭha a, group stage-ah harsatna an tawk lo. Chanmarians hian goal thum chhuah mah se goal 12 ngawt an khung a, tun inelnaa goal an khung tam ber bakah an goal difference pawh a ṭha ber.

Chanmari striker PC Rosangzuala ke a hmui a, match tinah goal khung vekin goal li a khung tawh. Serchhip tlangval Lalruatsanga'n bul ṭan ṭhin lo mah se goal khung a bansan chuang lo a, match tinah goal khat ṭheuh a khung bawk.

Striker pahnih PC-a leh Ruatsanga ten goal an khung hi Chhinga tan lawmna a ni a, right back Laltluangliana pawhin goal thum a khung. Republic Veng tlangval hi right back ni mah se a tlan chak bakah ball a pet thiam avangin Chanmari goal nawr nan a ṭangkai hle.

Chanmari hian Aron Vanlalrinchhana an la lut an vanneihpui a, Cherhlun tlangval hian goal khat chauh la khung mah se game timawitu leh thlak danglam theitu a ni. KC Malsawmsanga an chelh theih avangin Chanmari hian mual sir aṭanga an nawr a nat phah viau bawk.

Chhinga hote game a nghet ṭha a, group stage khel ṭha ber niin quarterfinal-ah Ramhlun North an hmachhawn dawn. First Division club tan I League club hi an ṭha hret thei a, Chhinga hoten fiahna tak tak an hmachhawn hun tur chu semifinal a ni. Chanmarians hian semifinal-ah nikum finalist Aizawl FC leh Mizoram Police chak zawk an hmachhawn ang.