Rublev hnehtu Fritz

Taylor Fritz chuan nimin zing khan Andrey Rublev hnehin Canadian Open khelh laiah quarterfinal a paltlang a, semifinal-ah chuan amah ang bawka American tlangval Ben Shelton a hmachhawn leh ang.

Centre Court-a inkhelah, seeded pahnihna Fritz hian seeded parukna Andrey Rublev hi 6-3, 7-6 (4) in a hneh, hnehna chang tur hian vawi 20 tehmeuh mai aces a hlap chhuak, a service ṭha tak chu a chak theih chhan a ni.

Fritz chuan, "Andrey hi chu engtik lai mahin hmachhawn a awlsam ngai lo. A tir aṭanga a tawp thleng khan min nawr na em em a, tihsual tlemtê awm zeuh kha ka hmang ṭangkai ṭhin, a tawpah a vannei zawkah ka ṭang ta hlauh.

"Ka match hmasa zawkah khan fiahna hautak em em mai ka hmachhawn a, chumi hnu lawkah chawlhna hun awm mumal loin Andrey nen kan intum leh a ni a, chak tlang tur chuan vanneih tel a ngai," tiin a sawi.

Inkhel dangah Ben Shelton chuan seeded pakuana Alex de Minaur chu 6-3, 6-4 in a hneh a, seeded palina Shelton hian a vawi khat nan ATP Masters 1000 tournament a lut, a tan chuan mellung pawimawh tak a tling.

Kum 2010 daih tawh khan Andy Roddick leh Mardy Fish te chu Cincinnati Masters semifinal-ah an lo inkhel tawh a, anni pahnih hnuah Fritz leh Shelton te hi American tlangval pahnih ATP Masters 1000 semifinal-a an intawn lehna hmasa tur a ni.

Kum 22 mi Shelton chuan, "Ka khelh dan phung chik deuh chuan ka tidanglam tih an hre thei ang. A chang chuan a rang thei ang bera point hlawhchhuah nghal mai ka duh ṭhin, tun ṭumah erawh kha chuan dawhthei taka nghah a ngai," tiin a sawi.