Kan driver te an inzah tawn - Brown

McLaren Formula 1 boss Zak Brown chuan an driver pahnih Lando Norris leh Oscar Piastri ten season duhawm an hmang tih a sawi a, inelna nuam leh thianghlim tak an hmachhawn dun mek tih a sawi bawk.

Car intlansiakna sang berah Piastri leh Norris te hian hnehna an inchan chhawk a ni ber a, tun hnai bikah Norris a cheṭha zawk. Mahse, driver championship table-ah erawh Piastri hi point kuain a la sang zawk, an inkar erawh a zim takzet tawh tihna a ni.

Brown chuan, "Hnehna chan châkin an tuihal reng a, khawvela a ṭha leh chak ber nih duhna thinglung an nei bawk, chu chuan inelna ṭha leh duhawm tak a chhawpchhuah tir a ni, kan tan chanchin lawmawm tak a ni bawk.

"An inzah tawn em em a, an inel rualin ṭhian ṭha tak an ni bawk," tiin a sawi. Formula 1 team tam tak chuan driver duhsak leh vulh bik an nei ṭhin, season kal laiah McLaren erawhin a en dan a inangkhat viau a, season chawhnu lamah eng nge thleng dawn erawh sawi lawk theih a ni lo.

Kuminah Piastri hian inelna parukah hnehna a chang tawh, a teammate Norris hi vawi nga a chak tawh thung; intlansiak an hmachhawn tawh zawng zawng hi vawi 14 a ni a, team dang tan hmun an kian meuh lo tih a ni.

Intlansiak an chawl lailawk zeuh dawn - Dutch Grand Prix chu August 29-31 chhungin an tlan leh ang. Brown chuan, "Kan driver pahnih hi mimal pawhin ka titi pui ve ve tawh, a hmasa bera tlan theihna remchang an hmu a nih phawt chuan an bawhpelh tur a ni lo.

"Chutihrualin, F1 hi team inelna a ni tel a, mimal point hmuh ṭhat bakah team tana ṭha ber tur chu kan ngaihtuah tel a ngai bawk," a ti. McLaren hian an driver pahnih inkarah buaina a awm loh thu sawi mah se, champion châk ve ve an nih avangin boruak ṭha lo awm thei an veng lawk nasa hle.