Messi inkhel thei dawn lo

Lionel Messi chu a tihrawl hliam vangin a chawl mek a, tukina Inter Miami leh Pumas UNAM ten Leagues Cup an khelhah a inlan ve thei lo, a chawlh chen tur erawh chiang taka sawi theih a la ni lo thung.

Inter Miami captain Messi hi Necaxa nen an inkhelh ṭumin a hliam a, hliam na tak ni hran lo mah se inkhel turin a la inpeih lo. Miami coach Javier Mascherano chuan, "Messi hliam kha chanchinthar ṭha lo a ni, a hliam na lutuk lo erawh chanchinthar lawmawm a ni.

"Dam leh thuai tura enkawl mek a ni a, beisei ang ngeiin a dam chak bawk. A dinhmun hi uluk takin ni tin en dik zel a ni dawn a, inkhel tura a inpeih thlap hma chuan kan hmang lui lo ang," tiin an captain lakah a dawhthei dawn hle.

Argentina captain Messi hian Major League Soccer (MLS) season kal laiah goal 18 a khung tawh, ani aia khung tam an awm lo. Kum 2023 khan Messi hian Miami chu Leagues Cup a lo lakpui tawh a ni.