Keys hnehtu Tauson

Canadian Open khelh laiah Clara Tauson chuan nimin zing khan Madison Keys chu 6-1, 6-4 in a hneh a, tennis inelna ngaihhlut pahnihna WTA 1000 huangah a vawi hnih nan semifinal a inhlangkai.

Danish nula Tauson hi seeded 16-na daih a ni a, rinkai tak a ni lem lo. Mahse, a match hmasa zawkah pawh Wimbledon champion Iga Swiatek a lo hneh tawh a, beisei phak baka ṭhain tournament a khel mek.

Seeded parukna Keys a hneh hnuah Tauson chuan, "Ni hnih liam ta mai khan ka pu a thi a, lu kan sun lai tak a ni. Tournament ka khel laklawh si a, tun ṭum kan inkhelh hma khan ka pu tan hnehna ka chang ngei tur a ni tiin ka infuih nasa hle.

"Mak tak maiin Swiatek ka hneh a, player ṭha bik ka paltlang avang khan inrintawkna pawh ka neih san belh hle. Inringtawk tak chunga match kan khel a nih hi chuan result ṭha pawh ka nei mai ṭhin," tiin a sawi.

Tauson hian a match lehpekah chuan Naomi Osaka a hmachhawn ang. Grand Slam vawi li champion tawh Osaka hian inkhel dangah Elina Svitolina chu 6-2, 6-2 in a hneh a, kum 2022 hnua a vawi khat nan WTA 1000 semifinal a lut ve leh ta chiah.