Loan hmangin Bale a chhuak dawn lo

Real Madrid forward Gareth Bale-a agent Jo­nathan Barnett chuan a player chu loan hmanga chhuak tur anga sawi thawm awm mah se loan chuan a chhuah loh tur thu a sawi a, "Thil awm ang lo tak a ni," a ti!

Kum 30 mi Bale hian nipui lai ang thoin thlasik transfer-ah chanchin a ngah leh ta viau. Real-ah kum 2022 thleng contract a neih avangin loan-a chhuak tur anga sawi a awm a, Tottenham Hotspur leh Manchester Uni­ted hming a ri ring hle.

Barnett chuan, "Eng­vangin nge khawvela player ṭha ber hi loan hmanga a chhuah teh lul ang le? Thu lawi lo mai mai a ni. Tunah chuan Real Madrid tan a khel dawn a, kum hnih leh a chanve cham turin contract a la nei bawk a ni," a ti. September 2013-a Real zawmtu forward hi manager Zinedine Zidane nen an inkar ṭha lo sa a ṭhat loh belh nia sawi a awm a, hei vang hian transfer-ah Bale-a chanchinin ngaihven a hlawh lehzual. Mahse, Barnett chuan, "He hmunah hian a hlim a, Real tan nomawi a chawi zel pawh ka beisei. Hetihrual hian thil erawh inthlak danglam thei reng a ni a, mahse loan erawh a nih ring suh u. "Khawvel club zingah hian Bale enkawl thei an tam lo," a ti a, a player chuan khawi hmun pawh pan se hlawh ṭhahnem tak a la hlawh reng tur thu a sawi tel. Bale-a khelhna Real Madrid hian Pathianni zan dar 1:30-ah league match an khel dawn a, Val­ladolid an mikhual ang.