PSG manager thar Pochettino

Paris St-Germain chuan an team enkawltu atan Mauricio Pochettino an lalut. Argentine manager hian French champion tan hian 2022 June 30 thleng daih contract a ziak a, kum khat atan pawhsei theih a la ni bawk ang.

PSG hian duhthusama season bul an ṭan loh avangin Thomas Tuchel an ban a, 2001-2003 chhunga an player lo ni tawh Poch hi Tuchel thlak nan an lalut ta a ni.

Kum 48 mi Pochettino-a'n 2019 khan Tottenham chu Champions League final a luhpui a, nomawi inchuhna inkhelah Liverpool an ngam lo. UCL final an khelh aṭanga thla nga hnu lekah Spurs hian an ban.

French Ligue 1 table-a pathumna nilai PSG hian season hmasa khan UCL final an lut, mahse Bayern Munich an ngam lo. Season kal laiah last 16 an lut leh tawh a, Spanish club lian Barcelona nen an inhmachhawn ang.

Ligue 1 hian thlasik chawlh an hmang. January 3, Pathianni khan training an nei leh ṭan a, manager thar Poch kaihhruaina hnuaiah inbuatsaihna an nei tawh dawn a ni.

Pochettino chuan, "PSG hian ka thinlungah hmun pawimawh tak pakhat a chang reng. Club hian thil tum ṭha leh ropui tak a nei a, chumi ti hlawhtling tura player ṭha tak tak thawhpui ka chak tawh hle," a ti.

PSG chairman leh chief executive ni bawk Nasser Al-Khelaifi chuan Pochettino chu an thil tum tih hlawhtlin pui tura an duhthusam niin a sawi ve bawk.

Poch an lak rual hian player thar pawh an lak ngei a rinawm. Argentine manager-in Spurs a enkawl laia a hman thiam, tun dinhmuna Jose Mourinho hnuaia tlatlum lo Dele Alli chu hming langsar a ni.