LBS Suzuki CYMA Futsal 2025: Zanin dar 7:00-ah Aizawl Venglai Vs Chanmari

LBS Suzuki 1st Inter Branch YMA Futsal 2025 boruak a nung chho zel a, vawiin hian last 32 khelh zawh a ni dawn. Last 32 kharnaa inkhel tur Chanmari leh an veng ṭhenawm Aizawl Venglai inkhel tur hi en a châkawm a, zanin dar 7:00 hian R. Dengṭhuama Stadium, Mualpuiah mipui ṭhahnem tak an punkhawm beisei a ni.

Football inelna bika chuan tun hnaiah Aizawl Venglaiin Chanmari an phak lo deuh a, mahse futsal-ah erawh an hlau bik lo khawp ang. Aizawl Venglai hian MFA buatsaih Inter Village Futsal-a an veng ṭhenawm Electric Veng an hneh ṭum ang thoin Chanmari hneh hi an châk dawn a, chumi tur chuan theihna an nei bawk.

Chanmari hi ISL player Jerry Mawihmingthanga'n a ho thei a, last 32 lut tura Chawnpui an hneh ṭum pawhin Jerry hian goal hnih khungin a pawimawh ve ve. Futsal inelnaah chuan Chanmari tan Jerry ang thoin Zomuanpuia a pawimawh hei ang.

Zan dar 6:00-ah Armed Veng hnethu Dinthar leh Ramhlun South an inkhel dawn a, futsal-ah chuan Dinthar buk rit zawk mah se Ramhlun South hian Futsal League club an nei tih hriat a ṭha.

Vawiina inlan ur zingah Sihphir Venghlun, Sihphir, Durtlang Leitan leh Ramhlun Vengthar te chu team ṭha an ni a, Tuikual Derby hmuh tur a awm dawn. Tlai dar 3:00-ah Tuikual North leh Tuikual South an inkhel dawn a, basketball-ah chuan TKS an chungnung zawk a, futsal-a chungnung zawk chu vawiin tlaiah a hriat ang.