I Day Veteran Football Vawiin aṭangin quarterfinal khel dawn

I Day Veteran Football quarterfinal chu vawiin aṭangin Chite Playground-ah khelh a ni dawn. Chawhma dar 11:00-ah 2K Generation leh G90’s Mizoram te an inkhel dawn a, chawhnu dar 2:00-ah Ramhlun United Veteran leh Veteran United te an inhmachhawn zui ang. Inkhel en man hi Rs 20 chauh a ni.

2K Generation hi I Day Football champion lai an ni a, final lut tur pawhin an buk a rit hle. Mizo football legend S. Malsawmtluanga (Mama) an neih hi an danglamna tur a ni a, Mama hian a taksa a la vawn ṭhat avangin a la che rang a, kum 40 chinah chuan a langsar hle. 2K hian Joseph Lalrinmawia, Aldrin Zonunsanga, Lalhruaitluanga leh Samson Ramengmawia te neiin an squad a chhah ṭha.

G90's hian Lalremruata (Arapa) an kawl a, MPL ṭantirh lamah pawh hming chher thei Arapa hi Veteran football-ah chuan Mama, Jerry Zirsanga leh Rohmingthanga te nen huang khatah an awm a, anni aiin a sang mah hial mai thei. Aizawl FC sporting director Hmingthansanga pawh hi Veteran football-a ke hmui ber zinga mi a ni. G90's leh 2K inkhel tur hi en châkawm tur a ni pha.

Ramhlun United Veteran leh Veteran United te inkhel turah hming langsar an tam lo a, mah se team indin ṭha ve ve an ni a, intluk tawk viau tura ngaih a ni. Veteran Football-ah hian 40+ hi playing XI-ah pali a awm theih a, 1985 leh a hmalama piang chin an ni. Kum 1980 leh a hmalama piang chin 45+ hi panga awm tur a ni a, kum 1975 leh a hmalama piang chin 50+ hi playing XI-ah pahnih awm ngei tur a ni bawk.