Viktor Gyokeres-a'n goal a la khung lo

Premier League season an la ṭan lo deuh a, mahse boruak chu a nung chho ṭan ta hle - Arsenal striker thar Viktor Gyokeres chu nipui bazara thawm nei lian a nih avangin a chevel in enzui a hlawh, goal erawh a la khung rih lo.

Kum 27 mi Gyokeres hian Thawhṭanni zan khan Villarreal a hmachhawn a, a tir aṭangin a khel nghal - minute 63 chhung khel mah se goal a la khung rih lo, an mikhual Spanish club lakah hian 3-2 in an tlawm.

Sporting Lisbon tan Gyokeres-a'n goal khung a harsat ngai lo, a club tharah hian eng ang takin nge a chet dawn tih erawh sawi thiam a la harsa. Kai Havertz leh Gabriel Jesus te tlarhma lama an chet dan nen chuan a inang dawn lo niin a rin theih.

Gunners manager Mikel Arteta-a'n Gyokeres a khelh tir danah chuan striker a ni a, tlarhma laiah awmin 'Number 9' a ni. Manchester City tana Erling Haaland an khelhtir dan nen a inang dawn a, ball chang tam lo mah se goal khung tura beisei a ni dawn.

Arteta chuan, "Premier League ṭan niah Manchester United kan hmachhawn dawn. Old Trafford-a inkhel turin Gyokeres hi 100%-in a inpeih ngei ang tih ka chiang, a chet dan ka thlir khan ka ringtawk hle a ni," tiin a striker thar chungchang a sawi.

North London club hian EPL ṭan hmain Athletic Bilbao an la hmachhawn dawn, chumi hnua an match khelh leh hmasak tur chu Man United nen a ni dawn; Gyokeres-a'n amah enkawl tawh ṭhintu Ruben Amorim a hmachhawn dawn tihna a ni.

Spanish manager Arteta chuan sawi zawmin, "Kan hnenah chawlhkar khat leh tlemte chauh hun a la hmang a, chumi chhung pawh chuan a theihna tam tak ka hmu tawh. Goal nawr kawngah a thawhhlawk hle dawn tih ka chiang," tiin a sawi.

Player thar dang Christian Norgaard erawh a khel ṭha pangngai viau a, goal a khung bawk. Arteta-a'n engtiang takin nge midfield a rem dawn tih hriat a la ni lo bawk - captain Martin Odegaard leh Declan Rice te nen khelhna an inchuh chho ang.

Bukayo Saka chu a fawng chelhtu a ni leh dawn tih a chiang a, mual sir lehlamah tunge awm ang tih a la chiang lo. Gabriel Martinelli leh Leandro Trossard te nei mah se Eze an la beisei - Crystal Palace forward hi an la nih pawhin season ṭan niah chuan a inkhelh hman a rinawm tawh loh.