Zverv hnehtu Khachanov

Canadian Open champion tura rinkai, khel ṭha tluang tak Alexander Zverev a chak lo. German tlangval hian beiseina sang tak nen semifinal khel mah se Karen Khachanov chu 6-3, 4-6, 7-6 (7/4) in a hneh lo a ni.

Nimin zing Centre Court-a inkhelah player pahnih an intum tawk hle, set khat an lak hnuah set thumna hmangin chak tur chinfel a ngai. Seeded pakhatna Zverev hian 3-1 in hma a hruai hman, chak turin a dinhmun a ṭha hman takzet.

Mahse, Russian tlangval Khachanov hian thapui thawh letin tie break a khelhpui a, a tawpah a chak tlang ta zawk. Final-ah chuan seeded palina Ben Shelton a hmachhawn leh ang, ani hian semifinal inkhel dangah Taylor Fritz a lo hneh ve thung a ni.

Zverev-a'n match point a hmuh tawh hnuah pawtthla leh thei Khachanov chuan, "Tihsual pakhat lek pawh nei zeuh ila chuan ka chak lo chu a ni der mai a, mahse vanneih thlak tak maiin ka che fuh hlauh.

"Hetiang hun hi ka tawng tam lo, point khat lek pawimawhna leh hlutzia chu a takin ka hmu thar. Final boruak pawh a sang dawn tih a chiang nghal a, a ṭha thei ang berin a hmawr bawk ka tum dawn a ni," tiin a sawi.

Semifinal lehlamah Ben Shelton hian amah ang bawka American player Taylor Fritz chu 6-4, 6-3 in a hneh, a vawi khat nan ATP Masters 1000 final a khel dawn a, champion zui a châk khawp ang.

ATP Masters 1000 hi Grand Slam dawta inelna ngaihhlut a ni a, ranking point 1000 awmna a nih avangin a hlu hle. US Open inbuatsaihna a ni tel nghal bawk a, tun ṭuma che ṭha tan hard court inelna lian hmachhawn a châkawm zual dawn a ni.