Arsenal an harh thar!

Premier League aṭanga tlak hlauhthawn awma ding hman Arsenal kha an danglam tawh. Mikel Arteta naute hian tun hnaiah a zawna match thum hnehna an chan avangin season thar atan European football an beisei ngam leh tawh.

Inrinni zan inkhelah Gunners hian West Brom chu 4-0 in an luhchhuah a, khelh 17 aṭanga point 23 hmuin league table-ah 11-na dinhmun an luah - palina Leicester City an phak lohna chu point ruk chauh a ni.

Arsenal defender Kieran Tierney-a'n Darnell Furlong a tlanhel hnuah goal ṭha bik a khung a, manager Arteta nauten rang zeta ball an inpek rah chhuah chu Bukayo Saka chuan khungin, chawlhlawk laiin mikhual lamin 2-0 in hma an hruai hman.

Inkhel chawhnu lamah thawnthu a danglam lo. Striker Alexandre Lacazette chuan goal hnih a khung. Tun hnaia khel ṭha thei tak Emile Smith Rowe-a goal shot per a khung a, chumi hnuah Tierney siamsak a khung leh bawk.

Sam Allardyce-a'n West Brom a enkawl tirh khan Arsenal chu tlahniam thei zinga mi niin a sawi a, tunah erawh a ngaihdan a danglam tawhin a rinawm.

Allardyce chuan, "Kan player neih te theihna ang tawk pawhin kan khel chhuak zo rih lo. Nitin hian hmasawn kan la mamawh hle," a ti. Match 17 aṭangin point riat chauh an la hmu a, inhamtang tur chuan thawhharh an mamawh hle.

Arsenal manager Arteta chuan, "Ni sarih chhungin match thum pawimawh tak kan khel a, hnehna kan chang vek. Inkhel harsa tak ni mah se ka naute kha hnehna chang turin an hriam tawk a ni," a ti.