Inkhelh ka duh a ni mai - Wirtz

Liverpool-in Bayer Leverkusen aṭangin Florian Wirtz an la lut a, German playmaker lakluh nan hian pound maktaduai 100 an inseng - a khelh ṭhat dan a zira £16mtd pek belh leh tur a ni ang.

Mi tam takin a man to avang hian Wirtz hi pressure nei turah an ngai a, mahse, kum 22 mi attacking midfielder hian a man chuan amahah nghawng a neih loh thu a sawi.

Wirtz chuan, "Inkhelh ka duh a ni mai - club pahnihin ka man atan eng zat nge sum an inpek tih lam ka ngaihtuah lo. Liverpool hi ka chet ṭhat theih beiseiin ka zawm a, ka ṭhian tharte pawh ka nel nghal hle.

"Zalenna neia inkhelh nuam ka ti a, chu zalenna chu kan manager hian min pe a ni. A ṭha thei ang bera khelh a, ka team tana chance tam thei ang ber siam ka tum ang," a ti a, a manin a delh rih loh thu a sawi.

Wirtz chuan Premier League-a a season hmasa ber tur ni mah se, a ṭhiante aṭanga engemaw chen a hriat tawh thu a sawi. Wirtz chuan, "Hmun dang aiin tharum hman nasat a ngai a, player tinte chu an chakin an che rang em em bawk tih min hrilh.

"Germany-a ka hriat loh tam tak hriat belh a, inzir belh ka châk tawh a, hmasawn zel ka tum a ni. Player thar kan awm nual a, hei hian boruak thara inher rem kawngah min pui hle.

"A pawimawh ber chu league nomawi chawi nawn a ni a, mahse a harsa dawn. Kei chuan chance siam a, theihtawp chhuah a, team tana tha thawh ka tum dawn a ni," a ti a, Reds fan-ten a inkhel hmuh an châk tawh.

Kum 22 mi Wirtz hian Leverkusen tan inelna hrang hrangah match 197 khelin goal 57 a khung a, assist 65 a nei. Bundesliga leh DFB-Pokal nomawi a chawipui bawk a, Liverpool-ah chet ṭhat chhunzawm a beisei dawn.