Kan inpeih e - Cody Gakpo

Liverpool-in player an lakluh nasat rualin chhuahtir an nei nual a, tlarhma bikah Luis Diaz a chhuak a, accident vangin Diogo Jota a thi a, Darwin Nunez chuan Al Hilal-a zawm dawn tih a chiang tawh bawk.

Reds tlarhmaa player langsarah chuan, season hmasa aṭangin Mohamed Salah leh Cody Gakpo chauh an awm tawh tihna a ni a, Gakpo hian season dang zawng aiin mawhphurhna a la nasa lehzual dawn nia sawi a ni.

Gakpo chuan, "Pre-season duhawm tak kan hmang a, kan thawkrim a, match ṭhenkhatah chuan kan khel ṭha hle. Player zawng zawngin Community Shield an thlir ṭhup a, kei pawhin inkhelh ka châk tawh hle," a ti a, inkhel tura a inpeih tawh thu a sawi.

Netherlands international chuan sawi zawmin, "A pumpui thlirin, team ṭha tak, inpawh tak kan ni a, chu chuan player tharte pawh a tlangnel tir vat zel. Player ṭhenkhat chu national team-a lo inhmachhawn tawh a, chutiang aṭanga lo inhresate an ni.

"Rin phak bakin an tlangnel chak a, keimah ang thoin, an in ang maia an khawsak theih ka beisei," a ti a, nipui transfer-a player an lakluh tharte chu a lo lawm.

Gakpo hian January 2023 khan Reds hi a pan a, Liverpool a zawm hnuah match 128 khelin goal 41 a khung a, assist 17 a nei bawk. Season hman zawh takah khan match 49 khelin goal 18 a khung a, assist vawi sarih a nei.

Diaz a chhuah tawh bawk avangin Gakpo hian a khel tam lehzual sawt dawn nia sawi a ni a, Dutch forward hi Community Shield chuhna inkhelah pawh bul ṭan leh ngei tura beisei a ni.