Vancouver-in Muller an chang

Bayern Munich chhuahsan hlim Thomas Muller chuan 2025 season khelh hmabak zawng khel turin Major League Soccer club Vancouver Whitecaps a zawm. Canadian club player ziahluh tawh zinga player langsar ber a ni ang.

Kum 35 mi Muller hi Bayern-in contract thar an zawrh lo a, Bavarians-ah a contract a zawh avangin a club duh a thlang thei. German forward hian Europe-a khelh chhunzawm aiin MLS lama pan a thlang ta zawk.

Vancouver hian 2026 MLS season atana designated player (DP) angin Muller hi an lalut a, MLS club tin hian season khatah DP player pathum an ziaklut thei a, heng player-te hi an salary cap chhungah a tel lo.

Muller hian kum khat leh a chanve chhungin euro maktaduai 6.6 a hlawh dawn a, Vancouver tana hlawh tam ber a ni dawn. Season ṭan hma khan Vancouver hian captain Ryan Gauld leh Andres Cubas te chu salary cap pawnah an hlawh an siamsak a, hmunruak pakhat a la nei.

German forward hian hmunruak pakhat hi a hnawhkhat dawn a, Vancouver tana hlawh tam ber ni mah se Inter Miami tana Lionel Messi hlawh €19mtd nen chuan inthlau. Chutihrualin LA Galaxy tana khel mek Marco Reus-a'n €1mtd a hlawh thung. Bayern-ah khan Muller hian kum khatah €20mtd a hlawh.

Vancouver hian Muller an lakluh theih nan hian FC Cincinnati aṭangin discovery priority rights an nei a, hemi nei tur hian sum an chan nual dawn. Kum 2025-a an sum chan tur (general allocation money) aṭangin $200,000 (£149,000) chu Cincinnati hian an chang dawn a, hei bakah hian kum 2026 GAM-a an sum chan tur $200,000 chu Cincinnati hnenah a kal bawk ang.

MLS danah 'discovery rights' a awm a, FC Cincinnati hian nikum thlasik lai khan Muller hi an dawr tawh avangin a be hmasatu an ni a, Vancouver-in player hi chang ta mah se zângnadawmna angin Cincinnati hian sum an dawng.

Muller hian Canada club a zawm hma hian Bayern Munich tan a hun pum a hmang a, kum 17 chhungin Bundesliga nomawi vawi 13, Champions League nomawi pahnih chawi a, Bavarians tan hian match 760 khelin goal 250 a khung.

Season liam ta khan Muller hian Bayern-ah hmun pawimawh a chang tawh lo nachungin inelna hrang hrangah match 49 a khel a, goal leh assist vawi riat ve ve a la nei pha tho. Germany tan pawh Muller hian sulhnu ṭha tak a nei a, World Cup 2014-ah an ram a champion pui bakah ram tan match 131 khelin goal 45 a khung.

Muller chuan, "Vancouver tana khelh ka châk tawh a, nomawi chawipui ngei ka duh. An khawpui chanchin ngaihnawm tak tak ka hria a, ka rawn kal chhan tur ber erawh nomawi a ni," tiin a sawi. Vancouver hian Western Conference-ah point khatin San Diego anpha lo mek a, regular season-ah match 10 khelh tur a la awm.

German forward hian nternational transfer certificate (ITC), visa leh work permit a tih fel hunah official-in Vancouver hi a zawm ang.