Bees striker Wissa-a'n chhuah a duh

Brentford forward Yoane Wissa leh head coach Keith Andrews te inbiak hnuah kum 28 mi forward hian training a zawm a, Bees chhuahsan erawh a la duh tho.

Wissa hian Newcastle United zawm a duh avangin club nen an inhmu thiam lo a, July thla tawp lam khan Brentford director of football Phil Giles nen indawrin chhuah an phal lo a nih chuan Bees tana khelh tawh loah a vau.

Magpies hian Wissa lalut tur hian Bees hi £25mtd-in an dawr a, a man hi a chet ṭhat dan a zirin £5mtd-ah a la pung thei bawk. Bees hian Wissa hlutna hi an dahsan avangin chhuah an la phal lo a, trainining zawm tawh mah se a hmalam hun tur a la chiang lo.

Inrinni khan Bees-in Queens Park Rangers 1-0 in an hneh a, hemi ṭum pawh hian Wissa hi a tel lo. Vawiin hian Borussia Monchengladbach nen friendly match an khel leh dawn a, squad-ah a awm ang em tih hriat a la ni lo.

Wissa hian July 21, Thawhṭanni khan pre season atana club inpuahchahna hmun Portugal a chhuahsan a, Bees-in manager Thomas Frank bakah captain Christian Norgaard (Arsenal) leh player pawimawh Bryan Mbeumo (Manchester United) te an chan bawk nen team boruak a ṭhat loh phah hle.

DR Congo international Wissa hi chuan Newcastle tana khelh a, Champions League khelh a duh a, a hmalam hun tichiang turin hun tam a nei tawh lo.