Mumang ramah Mboko

Victoria Mboko chuan a beisei phak loh a dai chhunzawm zel - nimin zing khan Elena Rybakina hnehin Canadian Open khelh laiah final a lut a, tawnhriat ngah Naomi Osaka nen nomawi an inchuh dawn a ni.

Kum 18 mi Mboko hi Canadian Open buatsaihtuten duhsak takin wildcard an pe a, duhsak a phu ang ngeiin a khel chhuak - Canadian rawlthar hian Wimbledon champion pawh lo ni tawh Elena Rybakina chu 1-6, 7-5, 7-6 (7-4) a hnehin a dai ngai loh ram a dai chhunzawm.

A vawi khat nana WTA 1000 final khel tur Mboko chuan, "Min thlawptu an tam em em a, anni tel lo chuan tun hun hi ka thleng thei lo ang. Chak lo leh ṭha lo tur zawka ngaih ni chunga chak theih hi a lawmawm," tiin a sawi.

Tun dinhmunah Mboko hi world number 85 a ni a, final-ah a chak emaw chak lo emaw pawh ni se, kar thara world ranking a chhuah thar hunah chuan a sang zual 50 zingah a inhlangkai thei dawn a ni.

Semifinal inkhel dangah Osaka chuan Clara Tauson chu 6-2, 7-6 in a hneh a, fa a neih hnuah inelna ngaihhlut bika a chet ṭhat leh ber ṭum a tawng mek; a hmawr bawk ṭha turin match khat chak a la hmabak.