CYMA Futsal: Vawiin aṭangin last 16, mipui an pawimawh dawn

LBS Suzuki Inter Branch YMA Futsal Tournament 2025-ah nizan khan round of 32 khelh zawh a ni a, team 16 chauh an dam tawh. Vawiin aṭangin last 16 khelh a ni dawn a, entu mipui an pawimawh dawn. R. Dengṭhuama Stadium, Mualpuia inkhel en man hi Rs 50 a ni a, Central YMA YouTube channel-ah live a pek chhuah a ni bawk.

Vawiin hian match pali a awm dawn a; Bawngkawn vs Sakawrtuichhun, Muthi vs Durtlang North, Nursery Veng vs Zonuam leh Kanan vs Electric Veng te an inkhel dawn a, in veng an tel a nih chuan a hmunah en ve ngei ang che. YouTube aṭanga en leh R. Dengṭhuama Stadium-a en boruak chu a danglam hlak.

Bawngkawn Vs Sakawrtuichhun

Mizoram pum huap infiamnaahh hian Sakawrtuichhun hian hriat an hlawh lo a, futsal hi an hming chher theihna tur niin a lang. Sakawrtuichhun hi first round-ah bye a, last 16 lut turin team ṭha Chanmari West (5-4) leh Zemabawk North (5-2) te an hneh. Bawngkawn lakah pawh Sakawrtuichhun tiro Franky Lalfakzuala, Malsawmtluanga Pautu leh Malsawmthara te a chet ṭhat chuan quarterfinal beiseina a awm a, mipui an pawimawh dawn.

Bawngkawn lam hi chu football khel thiam veng an ni a, Aizawl veng lian a nih avangin an boruak a lian a, champion an harsat thung. Tun ṭum inelnaah hian an veng tlangval F. Lalrozama'n ho a; last 16 thleng turin Lungphun (12-5), Dawrpui Vengthar (10-2) leh Chawlhhmun (3-1) te an hneh. Lungphun an khelh ṭum hian player pathum lekin bul an ṭan a, an chak tho. Lalpekhlua, Johny Lalruatfela, C. Lalmalsawma te thlawp turin football lama tawnhriat nei ṭha H. Lalmuankima te an awm. Bawngkawnin chak an inring dawn a, an beisei ang result hlawh chhuah erawh a awlsam dawn lo.

Muthi Vs Durtlang North

Muthi hian Zemabawk South (16-2), Melriat (4-2) leh Luangmual (7-1) te an hneh tawh a, champion thei team an ni a, quarterfinal lut turin an buk a rit hle. Edward Lalruatkima leh C. Zomuanpuia te goal nawr kawngah a ṭangkai a, Daniel Rampanvara thahrui leh tawnhriat hi team tan a ṭangkai viau bawk. Futsal inelna hi Muthi hian an uar hma a, team ṭha an nei a ni ringawt lo a, ṭawiawmtu pawh an nei ṭha.

Durtlang North hian Thinglian (4-1), Edenthar (1-0) leh Tlungvel Vengthar (2-1) in an hneh a, Muthi an dah sang bik dawn lo. Last 16-ah tawp mai an duh dawn lo a; quarterfinal lut turin R.Vanlalawmpuia 12leh Zothansanga te an pawimawh dawn.

Nursery Veng Vs Zonuam

MFA buatsaih Inter Village Futsal inelna hnuhnung ber champion Zotlangin team ṭha an nihzia an pholang a, an match hnuhnung berah inkhel thunun chungin CYMA Football champion Republic Veng 2-0 in an hneh. Zonuam hian Zemabawk (1-0) leh Tuithiang (3-1) te an hneh tawh bawk a, futsal khel thiam veng an nih avangin Nursery aiin an buk a rit zawk.

Zonuam hian goal an la khung tam loh chhan hi an khingpuite an ṭhat ṭhin vang a ni a; goal ruk hi Peter Lalzuiliana (2), K. Lalmalsawma (2), Lallawmzuala leh Lalhruaizela te khung a ni a, player tin hian ball an pet theih hlawm avangin team anga ven an ngai. Chutihrualin Nursery Veng hi futsal khel thiam veng tho an ni a, inelna an buatsaih nasat avangin futsal inelna kalhmang pawh an hrechiang hle.

Tlai dar 5:30-a inkhel ni mah se Nursery hian ṭantu an nei ṭha dawn a, Zonuam an ṭan viau a nih loh chuan entu lamah chuan Nursery lam an ṭha zawk dawn. Mission Vengthlang laka hnehna an chan theih nan Nursery mipui an pawimawh a, Zonuam lakah pawh an game nung ṭha tak lantir leh an tum ang. Nursery hian last 16 lut turin Laipuitlang (4-1) leh Mission Vengthlang (3-2) te an hneh a, vawiinah fiahna tak tak an hmachhawn dawn e.

Kanan vs Electric Veng

Electric Veng inkhel a nih chuan a hmuhnawm dawn a, football thiam veng tia lar ṭhin kha futsal thiam veng tiin an lar tawh. Last 32-ah Electric Veng hian Durtlang penalty shootout hmangin hneh hram mah se chak phu zawk an ni a, chutihrualin inkhel hi rinlawk ang ngeiin a hmuhnawm takzet. Electric Veng hian Durtlang an hneh hma hian Aibawk (11-0) leh Ramhlun North (7-2) in an hneh tawh a, Kanan lakah pawh an buk a rit zawk dawn.

Mahse, Kanan hi tun ṭumah hian team ṭha an ni a, last 16 lut tur hian Selesih (2-0), Bethlehem Vengthlang (6-2) leh Tlangnuam West (3-0) te an hneh. ISL player Freddy Lallawmawma bakah Joshua ZD Lalruatfela leh Jerome Laltlanhlua te an pawimawh dawn a, chutihrualin an khingpui hi Electric Veng an nih miau avangin team anga an thawho ṭhat viau a pawimawh ang.