AIFF Futsal Club C'ship: Thlangtiangin champion lai an hneh

AIFF Futsal Club Championship 2024–25-ah Mizoram aiawh Thlangtiang FC chuan match hmasa berah champion lai Corbett FC chu 3-0 in an sawp. Mizo club tan hian Joseph Lalkhawngaiha, Lalremtluanga leh Rampianmawia ten goal khat ṭheuh an khung

Thlangtiang awmna group B inkhel dangah Bhawanipore-in Golazo FC 16-2 in an sawp. Inelnaah hian team 17 an tel a, group paliah ṭhendarh niin group tin aṭangin team pahnihin quarterfinal a lut dawn. Group A-ah Juggernaut chuan match thum khel tawhin an chak vek a, quarterfinal lut hmasa ber an ni.

AIFF Futsal Club C'ship hi Shri Manoj Sarkar Stadium, Rudrapur, Uttarakhand-ah neih a ni a, Mizo an langsar hle. ARDECO Construction-in an sponsor Thlangtiang hi Mizo hlang an ni a, an khingpui Corbett FC-ah hian Mizo 10 an awm tling.

Coach Thomas Lalengkima game plan a thawk a, first half-ah goal lut lo mah se second half-ah goal thum khungin hnehna an chang. Thlangtiang hian vawiin tlai dar 5:00 hian Golazo FC an hmachhawn dawn a, hnehna an chang a nih chuan quarterfinal an lut dawn.

Thakthing pa Thomas chuan, "Inelna hmachhawn turin kan thawkrim a, Pathian khawngaihna zarah pawh kan ṭan ṭha. Chutihrualin kan hmabak a la thui a, Mizo mipuite puihna kan mamawh hle," tiin Vanglaini a hrilh. Inkhel hi Indian Football YouTube Channel aṭangin a en theih.

Bhawanipore hian zanin dar 7:30-ah Corbett FC an hmachhawn thung. Kolkata club innghahna hi Mizo player-te an ni a; Golazo FC 16-2 a an hneh ṭum pawhin David Laltlansanga, K. Roluahpuia leh Laltluangzela ten goal hnih ṭheuh an khung bakah Lalsangkima leh Ephraim Vanlalduhsaka ten goal khat ve ve an khung bawk.