G90's leh Ramhlun United an chak: Vawiinah quarterfinal hmuhnawm

I Day Veteran Football quarterfinal-ah vawiin hian team ṭha pali an inlan dawn a, Chite Playground-a inkhel pahnih hi a hmuhnawm ve ve dawn. Nimin khan G90's Mizoram leh Ramhlun United Veteran chuan 2K Generation leh Veteran United hnehin semifinal an lut.

Vawiin chawhma dar 11:00-ah hian Ditea's FC leh Mizoram Ex-Service te an inkhel dawn a, Ditea's hian player ṭha ngah mah se Ex-Service lam hian champion thei squad an nei ve tho.

Ditea's hian Jerry Zirsanga, Zohmingliana Ralte (Zotea), Joel Thangmawia, Lalropuia leh Pianfela te an kawl a, goalkeeper-ah Zarzoliana an kawl - tlarhma leh tlarhnungah an ṭha. Mahse, an khingpui Mizoram Ex-Service hi an tawh a khirh dawn. Lalvulluaia, Victor Lalbiakmawia leh Lalramhluna te an kawl a, an khawng ṭha viau ang.

Chawhnu dar 2:00-a Leitan leh Electric Veng te inkhel tur hi a hmuhnawm zawk hial thei ang. Leitan hian Rohmingthanga an nei a, Electric Veng lam hian Santosh Trophy champion ṭuma vice captain V. Lalṭanpuia leh goalkeeper Vanlalhriata te an kawl. Hei bakah hian Eletric Veng veteran te hi an khelh ho tam avangin vawiinah rinkai lo zawk ni mah se an tawh a khirh viau ang.