Chelsea-in Garnacho an hnaih

World champion Chelsea chuan Manchester United-a tui tawh lo, Argentina winger Alejandro Garnacho chu lakluh tumin an dawr mek a, kum 21 mi forward hian Stamford Bridge a pan lo ang, tih a sawi theih ta loh.

Kum 21 mi Garanacho hi player hmabak nei êng tak ni mah se, season hmasa Europa League final-a bul a ṭan loh hnuin, a hriatthiam loh thu social media lamah a tarlang a, United head coach Ruben Amorim a tilawm lo.

Portuguese coach hian a player hi a chhuah theih thu a hrilh zui a, January pawha Blues nena lo sawi zawm tawh player hian nipui transfer inhawn rualin club a zawng nghal a, tunah chuan Blues nen an inhnaih ta hle.

Hetihrual hian United hian Garnacho manah pound maktaduai 60 bawr vel an beisei nia sawi a ni a, heti zata lei ngam club an awm kher ang em, tih chu zawhna a ni.

Garnacho hi kum 16 mi lek a nih laia United zawm a ni a, hei vang hian Red Devils hian an hralh a nih chuan Premier League hnuaia Profit and Sustainability rules (PSR) ah nasa takin a pui thei ang.

Argentine forward Garnacho hi Asia tour-ah khan hruai ni mah se, tun hnaia USA-a match thum khel United squad-ah hruai tel a ni lo a, Amorim-a mamawh loh Tyrell Malacia, Jadon Sancho, Antony leh loan-a Barcelona zawm ta Marcus Rashford te nen a hranin training neihtir an ni ṭhin.

Atletico Madrid aṭanga United academy zawm a, senior team tana inlan zui Garnacho hian Manchester khaw club tan inelna hrang hrangah match 144 a khel hman a, goal 26 khungin, assist vawi 22 a nei.