A vawi khat nan Mboko-i a champion

Victoria Mboko chuan a dai phak ngai lo ram a dai - Canadian tleirawl hian nimin zing khan Naomi Osaka hnehin Canadian Open title a la a, a vawi khat nan WTA 1000 title a lakna a ni ta chiah bawk.

A ranking a hniam avanga wildcard pek ngai hial, champion tura beisei ni phak miah lo khan final a khel a, nomawi inchuhna inkhelah Grand Slam vawi li champion tawh Naomi Osaka chu 2-6, 6-4, 6-1 a hnehin a champion ta a ni.

Kum 18 mi Mboko-i hian set hmasa ber a hloh a, set hnihna aṭang erawh chuan a chungnung hle. Mual sira inkhel entuten an thlawp ṭha em em a, a chet fuh deuh hlek chuan thawm pawh a ṭha thei hle.

Set hnihnaah hian 5-2 a hmahruai turin a khingpui service a chhuhsak a, a hnuah game hloh chu nei ve leh mah se a talbuai zui tawh lo. Set hnuhnung berah erawh 3-1 in hma a hruai fal nghal thei, a tawp thlengin a dingchang ta zawk.

Kum 18 mi Victoria Mboko chuan, "Match hautak leh ka tana ropui tak ni bawk min khelhpuitu Naomi chungah ka lawm. Naupang deuh ka nih laiin a inkhel ka en ṭhin a, kawng hrang hrangin ka entawn nasa hle bawk a ni.

"Ka tan chuan Montreal hi a hluin theihnghilh theih a ni dawn tawh lo, tournament ka khelh vawi khatnaah hlawhtlinna ka chang ta a ni. A nihna takah chuan match hmasa bera chak pawh kha ka tan lawmna tawk a tling tawh, champion phei hi chu beisei phak loh thil a ni," a ti.

Nomawi a chawi theih nan hian Grand Slam champion ni thei player pali ngawt a hneh. Osaka hma hian final kalkawngah Sofia Kenin, Coco Gauff leh Elena Rybakina te a hneh vek a, a tan chuan mellung pawimawh leh hlu tak a ni chiang hle.

Chak lo zawk Osaka tan pawh lawmna tur a awm. Fa a neih hnuah ṭha takin a inkhel thei leh ta tih fiahna a ni a, chutihrualin WTA title erawh a la thei mai rih lo, kum 2021 Australian Open hnuah a la champion leh lo a ni.