Axelsen inkhel thei dawn lo

Viktor Axelsen chuan BWF World Championship a khel thei dawn lo - Olympic gold medal vawi hnih la tawh hi a hnungzâng na vangin a chawl mek a, a la dam hman dawn rih lo a ni.

Denmark tlangval Axelsen chuan, "Dam leh thuai tura enkawl mek ka ni a, theihtawp tak meuh pawh ka chhuah. Mahse, kan damdawi lam thiamte nen kan inrawn khawm hnuah ka tan World Championship khelh ve a remchang dawn lo.

"Tournament lian leh ngaihhlut tak khelh theih loh chu a hrehawm pawh ka ti a, ka inkhel hmuh châk leh en lo beisei tute duh ang ka tihlawhtling thei lo tur hi a pawi ka ti hle. Chutihrualin, ka taksa dinhmun ka ngaih pawimawh a ngai ve dawn si a ni," tiin a sawi.

Axelsen-a'n tournament a khelh hnuhnung ber chu All England Open Badminton Championship kha a ni a, inelna an neih ṭum khan Lin Chun-yi a hneh lo, a chak loh hnuah zai a nih tur thu a sawi a, a hliam vang hian a chawl ta ngar ngar a ni.

Player ṭha bik Axelsen hian kum 2017 leh 2022 khan BWF World Championship nomawi a lo chawi tawh a, infiamna khawmpui lian Olympic-ah pawh 2020 leh 2024 khan gold medal a lo hlap chhuak tawh bawk.