Ballon d’Or dawng thei tur chhawp chhuak

Football khawvela mimal chawimawina sang leh ngaihhlut hlawh Ballon d’Or 2025 dawng tur tar chhuah a ni ta a, player 30 an tarlan zingah hian Ousmane Dembele, Kylian Mbappe leh Mohamed Salah te chu hming langsar an ni.

Barcelona rawlthar Lamine Yamal pawh hming langsar zinga mi a ni a, Spain international hian hmanni lawk khan kum 18 a tling ve chauh, kuminah hian Kopa Trophy dawng thei tur zingah a hming a lang tel bawk.

Paris Saint Germain forward Dembele hian season hmasa khan goal 36 a khung bakah assist vawi 13 a nei a, a club hi champion theihna hoah chuan a champion pui vek - a vawi khata nana Champions League an champion theih chhan langsar a ni bawk.

Premier League champion Liverpool forward Salah hming lam hmaih a thiang lo a, Real Madrid a zawm hnuah che ṭha nghal Mbappe pawh mimal chawimawina dawng thei tura buk rit zinga mi a ni ang.

June thla maia UEFA Nations League champion Cristiano Ronaldo tan hmun a awm lo a, Portugal captain ang bawk hian he award dawng hnem ber Lionel Messi chu chhawpchhuah zingah a tel lo bawk.

Messi leh Ronaldo te Ballon d’Or list a an lan dun hnuhnung ber chu kum 2021 daih tawh kha a ni, player ropui bik pahnihten inkhelh la chawlhsan chiah lo mah se an vanglai a pel tawh a, an herliam ve mek zel a ni.

Kum 1956 aṭanga sem ṭan Ballon d’Or hi September 22 zan hian Paris khawpuia awm Théâtre du Châtelet-ah an sem ang.