Dinthar nge ṭha zawk Saikhamakawn?

Vawiin chawhnu dar 1:00 hian I Day Football quarterfinal-ah Saikhamakawn leh Dinthar FC te an inkhel dawn a, club hming aṭanga thlir mai chuan Maimawms hi buk rit tur zawk an ni. Mahse, group stage an khelh dan aṭanga thlir chuan MPL vawi khat khelhna tur Saikhamakawn hi team ṭha zawk an ni.

Saikhamakawn hi coach Lalsangzuala Hmar enkawl a ni a, group stage-ah Aizawl FC nen an inhnehtawk bakah MPL club MLS FC chu 6-0 in an sawp. Tlarhmaah Suanngaihmuana leh Lalnunzira Sailo te an nei a, goalkeeper-ah CYMA Football best goalkeeper RS Lallawmzuala an kawl. MPL club thar hian entu an nei ṭha a, Dinthar lakah chak turah an inngai ang.

Chutihrualin inelna lianah chuan knockout chinah club lian danglamna a lang ṭhin a, quarterfinal a nih tawh dawn avangin Dinthar hi dah hniam ngawt a rem lo. Laldampuia kaihhruai Dinthar hian Chanmari hneh loin bul ṭan mah se Tuithiang leh FIFA AIFF Talent Football Academy te an sawp.

Maimawms hian MPL hmasa ber best player R. Laldanmawia leh best forward MS Dawngliana te an kawl a, tun inelnaah winger tlan chak pahnih Ricky Lalramnghaka leh Lalrintluanga (Tutua) te an che ṭha bawk. Dintharin MPL club thar Saikhamakawn hi rilru takin an hlau dawn lo a, hei tak hi inkhel tihmuhnawmtu tur a ni.