A tawp kharna Kanan vs Tuithiang

I Day Football quarterfinal match hnuhnung berah Kanan leh Tuithiang te vawiin tlai dar 3:30 hian RG Stadium-ah an inkhel dawn. Kanan hian group stage-ah champion lai Mizoram Police bakah Ramhlun North leh SYS FC te an hneh a, Chawngthansanga hote hi an khelh tawh dan thlir chuan champion rinkai zinga mi an ni hial.

Kanan hian hnehna an chan a, quarterfinal pakhat zawka Dinthar an chak bawk chuan semifinal-ah Aizawl West Derby a hmuh theih ang. MPL club thar hian tlarhma an nei ṭha a; Lalthanpuia (Tepuia), Lalthanzuala, F. Lalawmkima leh Lalthuthlunga te an hmuhnawm ṭhin. An tlarhnung lam hian fakna la dawng lo mah se goal an la chhuah lo a, statistics aṭanga thlir chuan tlarhma ang thoa fak tur an ni.

First Division club Tuithiang FC dinhmun dik tak hi hriatthiam a la harsa a, an group-a kum 14-15 rual AIFF Academy awm vang chauha quarterfinal lut an ni em tih hi zawhna a la awm. Kanan lakah Tuithiang dinhmun a hriat dawn a, knockout football a nih tawh avangin First Division club hi squad pan zawk mah se chak thei an ni tlat.