Chanmari hmaah Ramhlun North

I Day Football group stage-a khel ṭha ber chu Chanmari FC an ni a, Rochhingpuia kaihhruai I League club hian vawiin chawhma dar 10:30 hian Ramhlun North an hmachhawn dawn. Chanmarians hi chak tura rinkai zawk ni mah se First Division club Ramhlun North hi Lalrindika Hmar kaihhruai an nih avangin zuam ngawt a rem lo ang.

Chanmari hian tun inelnaah goal 12 khung tawhin goal thum chauh a la chhuah a, I Day Football atana an squad a chhah ṭhat bawk avangin match thum an khelh tawha an la chak vek hi thilmak a ni hran lo. Chanmarians tlarhma PC Rosangzuala, Lalruatsanga, Aron Vanlalrinchhana leh KC Malsawmsanga ten an tih tur an tih a, goal an khung hma a nih chuan harsatna nei loa chak thei tur a ni.

Chutihrualin Rindika Hmarin awmze neia game plan a siam a, team ṭha lo zawk an ni tih hriaa goal venhim a ngaih pawimawh erawh chuan Chanmari tan buai theihna tur a ni dawn. Ramhlun North hian season thara MPL khelh ngei an tum avangin player pawh an nei ṭha a, group stage-ah pawh MPL club pahnih Police leh SYS FC te an chelh.