Vawiinah I Day Veteran Football semifinal

MFA buatsaih I Day Veteran Football semifinal chu vawiin hian Chite Playground-ah khelh a ni dawn. Chawhma dar 11:00-ah G90's Mizoram leh Ramhlun United Veteran te an inkhel ang a, chawhnu dar 2:00-ah Ditea’s FC leh Electric Veng Veteran FC te an inkhel ang.

G90's hian quarterfinal-ah team ṭha zawka ngaih 2K Generation an hneh thei a, hnehna a chan theih nan Lalremruata'n (Arapa) goal hnih a khung. Semifinal an khingpui tur Ramhlun United Veteran hian Veteran United an hneh a, G90's hi quarterfinal-ah chak tura rinkai lo zawk ni mah se vawiinah erawh team ṭha zawka ngaih an ni.

Ditea's FC leh Electric Veng inkhel tur hi a hmuhnawm dawn. Semifinal lut turin Ditea's FC-in team ṭha Mizoram Ex-Service 2-0 in an hneh a, Lalthanpuia leh Jerry Zirsanga ten goal an khung. Thanpuia hian kum 2004 leh 2005 khan Republic Veng chu Inter Village leh CYMA Football-ah double champion a nihpui tawh a, Jerry hi Asia Under 17 All Star-ah pawh tel tawh TFA Academy chhuak niin India tan thlenga pet goal tawh a ni.

Ditea's khingpui tur Electric Vengin inbuatsaihna an nei ṭha a, quarterfinal-ah Rohmingthanga telna Leitan Veteran chu Lalruatsaka goal hmangin an hneh. Bethlehem pa Ruatsaka hi veteran-ah inlan thei tawh lo mah se CYMA Football-ah khan an veng tan la khelin hattrick hial a la siam thei a, Leitan laka a goal pawh a ṭha takzet.