Thlangtiang an chak lo

AIFF Futsal Club Championship 2024–25-ah Mizoram aiawh Thlangtiang FC-in Inrinni zan khan Golazo FC 6-4 in an hneh lo a, group stage paltlang a harsa dawn. Mizo club hian match hmasa berah Corbett 3-0 a an hneh avangin Golazo an hneh chuan quarterfinal an lut dawn a, an chak tak loh avangin tla thei dinhmunah an ding ta thung.

Golazo hian an match hmasa berah Bhawanipore 16-3 in an hneh lo a, an result a ṭhat loh avangin Mizo club-in an zuam sual hret niin a lang. Shri Manoj Sarkar Stadium-a inkhelah Golazo zawkin hma an hruai zel a, Thlangtiang lakah 6-4 in an chak.

Mizo club tana R. Lalmuankima, R. Lalchhantluanga leh Lalremruata te goal khungin danglamna a thleng pha lo a, minute 40-naah Arjun Satyajit Singh-a'n an lamah a tih luh bawk avangin inkhel tawp lam erawh a nung ṭha.

Bhawanipore-in Corbett 9-4 in an sawp a; Kolkata club tana goal khungtu zingah Laltluangzela a tel. Bhawanipore hi vawi hnih chak tawh mah se Mizo club-in an khingpui an hneh loh avangin chhiarkawp danin quarterfinal an la lut bik lo. Chutihrualin Kolkata club hi an goal difference a ṭhat avangin knockout stage erawh lut ngei tura ngaih an ni tawh thung.

Zanin dar 5:00 hian Thlangtiang FC-in Bhawanipore an hmachhawn dawn a, Mizo club tan chak a ṭul tawh dawn. Dar 7:30-ah Golazo leh Corbett te an inkhel zui ang. Team paliin quarterfinal luh beiseina an la nei vek.