Season bul ṭan thei lo tur Rodri

Manchester City manager Pep Guardiola chuan a midfielder pawimawh Rodri chu hliam vangin a chawlh rih a ngai dawn tih a sawi - Premier League season tirah a hmel kan hmu ve thei dawn lo a ni.

Spain international Rodri hi season hmasa pawh khan hliam vangin hun rei tak a inkhel thei lo, tun hnaiah rawn dam chhoin inkhel ve leh thei tawh mah se a khel bawr a hliam leh - September thla laihawl vel aṭang chuan a inkhelh leh theih an beisei thung.

Ballon d'Or 2024 dawngtu chungchang sawiin Guardiola chuan, "Rodri dinhmun kha a ṭha chho hman hle a, mahse Al-Hilal nen Club World Cup kan khelh ṭum khan a inhliam, hei vang hian ngai a la awm ve thei rih lo.

"Training erawh zawimuangin a nei chho thei tawh a, tuna a lan dan chuan September thlaa international break kan neih zawh hunah a inkhel ve thei tawh ang, hemi hunah hi chuan a fit hman ngei ka beisei," tiin a sawi.

Man City hian Premier League season thar an match hmasa berah Wolves an hmachhawn dawn, international break awm hmain Tottenham Hotspur leh Brighton te an la hmachhawn leh hman dawn bawk.

Guardiola chuan, "Theih ni se la chuan Rodri hi inkhel tam se tih a ni a, mahse a pawimawh zawk chu a dam fel kim hun a ni zawk. Tun hnaiah ṭum hnih chu a ṭhiante zingah a training ve thei a, amaherawhchu ngaiawh tur chuan hun a la mamawh," tiin a sawi.

Season thar inbuatsaih nan Manchester City hian nimin zing khan Palermo an hmachhawn a, striker Erling Haaland-a goal khat bakah Tijjani Reijnders-a goal hnih hmangin 3-0 in an chak a, season thar atan an inpeih tawh hle.