MLS-ah Son a inlan ve ta

Tottenham Hotspur chhuahsana Major League Soccer club Los Angeles FC zawmtu, South Korean forward Son Heung-min chuan a club thar tana a match hmasa ber chu nimin zing khan a khel a, a team tan penalty a hlawh chhuak nghal.

Nimin zing inkhelah LAFC hian khualmualah Chicago Fire an lenchilh a, mualneitu team tana Carlos Teran-a goal hmahruai khung chu Los Angeles club hian Ryan Hollingshead hmangin an chhanglet.

Mahse, Chicago hian Jonathan Bamba hmangin an khung leh a, 2-1 a ni. Minute 61-naah Son luhtir a ni a, Spurs captain hlui hian chak taka ball um lutin, tihtluk a ni a, penalty a hlawh chhuak zui.

Denis Bouanga chuan hei hi goal-ah a chantir a, Son-a hoin point khat an hlawh chhuak. Son chuan, "A nuam ka ti takzet - khualmuala ka inkhelhin hetiang em ema lawm hi ka hlawh ngai lo.

"Miten nuam ti taka inkhel an en hmuh kha nuam ka ti a, MLS hi nuam ka tinghal hle a ni," a ti a, LAFC defender Ryan Hollingshead chuan, "Khawvel huapa player lar a ni a, player ṭha tak a nih avangin thil awm tak pawh a ni.

"Minute 20/30 vel chauh a awm tawh tihah a lo lut a, game a rawn thlak danglam nghal a, kan neih ve loh thil a rawn phochhuak nghal thei. Chutiang vanga la lut pawh kan ni a, a theihna hi a la sang hle a ni," a ti.

Son hian USA-ah lawm a hlawh hle a, mipui 28,000 lenna SeatGeek Stadium-ah Son hmuh châkin, stadium khat vekin fans an pungkhawm a, khelmual a lut chiah chu thawm a ṭha ham ham hle.

South Korean forward inkhel en tura kal fan-te hian Son-a te ram, South Korea jersey, Tottenham Hotspur leh Bayer 04 Leverkusen jersey-te an ha a, Asian footballer lar boruak hi lian tak a ni.

Son hian kar hmasa khan kum 10 zet a lo khelh tawhna Spurs chu chhuahsanin, LAFC hi MLS player man to ber ni turin a zawm a, LAFC player a nih thu puan a nih aṭanga ni thumna lekah a match hmasa ber a khel nghal!

Kum 33 mi forward hian Spurs tan match 454 khelin goal 173 a khungsak a, assist vawi 101 a nei. Season hman zawh takah khan Europa League-ah a champion pui a, a hna a hlen tawhah a inngaih avangin US a pan ta - a thawm a lian chhunzawm zel.