Zote Honda MZP & MSBA : Inter College 9 Ball Pool Championship an zo fel

A vawi khat nana buatsaih - Zote Honda MZP & MSBA Inter College 9 Ball Pool Championship 2025 chu a hmawr bawk a ni ta. Mipa inelna huangahah Govt. J Thankima College (JTC) zirlai C. Lalramluahsanga chu pakhatna a ni.

C. Lalramluahsanga hian, final-ah Lunglei Government College zirlai Joseph R. Lallawmawma chu 5-3 a hnehin a champion. Government Aizawl College zirlai Joseph Vanlalnunzira leh Mizoram Christian College zirlai D Muanthanga te erawh semifinal-ah an zinkawng a tawp.

Hmeichhe inelna lamah Government Mizoram Law College zirlai Lalrinkimi pakhatna a ni a, ani hian GAC zirlai Mary Lallenkimi chu final-ah 4-2 a hnehin a chungnung zawk.

Doubles final-ah hian LGC zirlai pahnih - Joseph R. Lallawmawma & Lalfakzuala Khiangte te'n JTC zirlai C. Lalramluahsanga & Lalrinnunga te chu 4-1 a hnehin an champion bawk.

Inelna hi August 6-8 chhung khan MSBA Hall, Hawla Indoor Stadium, Republic Vengthlangah khelh niin, college pakua aṭangin zirlai 29 an inlan a ni.