West Ham keeper thar Hermansen

Premier League club West Ham chuan goalkeeper thar Mads Hermansen an la lut - Leicester City si ban nghak ṭhintu an lakna zat hi tarlan chiah ni lo mah se, pound maktaduai 20 bawr vel niin an sawi.

Denmark international hian kum nga daih contract a ziak a, an inrem dan chuan season khat dang atana pawh sei leh thei tura tih a ni bawk - season hmasa khan Foxes tan Hermansen hian a khel ṭha; EPL khel turin inhamtang zui lo mah se Hammers bakah club dang pawhin an hel nual a ni.

Lukasz Fabianski a chhuah avangin West Ham hian keeper an mamawh a, an neih sa kum 32 mi Alphonse Areola hian season hmasa khan match 26 a khel a, tunah chuan Hermansen nen khel phak zawk nih an inchuh ang.

Brondby tana a khelh laiin Hermansen hi Casper Ankergren nen an lo thawkdun tawh. West Ham coach Graham Potter kaihhruaina hnuaiah Ankergren hi goalkeeping coach a ni leh mek a, tun hma lama a hriat chian tawh sa Hermansen a la leh chat a ni.

Premier League aṭanga tla hlim Foxer aṭang hian Hermansen bakah Wilfred Ndidi a chhuak tawh bawk. Midfielder Ndidi hian season riat leh a chanve chhung hun a hman tawhna King Power Stadium chhuahsanin Turkish club Besiktas a zawm.