Martinez-a'n Al Nassr a zawm

Spain defender Inigo Martinez chuan Barcelona a chhuahsan hnuah Al Nassr a zawm fel leh nghal - Saudi Pro League club chuan Martinez an lakluh thu hi Pathianni khan an puang a ni.

Tun nipui bazar chhungin Al Nassr hian player langsar pahnih an lakna a ni ta chiah; Martinez hma hian Portuguese forward Joao Felix chu Chelsea aṭangin an lo lei fel tawh bawk.

Kum 34 mi, Barcelona tana nomawi pathum chawi hlim Martinez chungchang sawiin Al Nassr chuan, "Kum 2026 thleng atan Inigo Martinez nen inremna kan nei," an ti a, a club hmasa tana contarct hmang zo hlim a nih avangin man nei loin an la lut.

Al Nassr hian an thiampuipa Cristiano Ronaldo-a contract chu kum hnih dang atan an pawtsei tawh bawk a, team ṭha lehzual zawk nih tumin hma an la mek; August 19 hian Saudi Super Cup semifinal-ah Al Ittihad an hmachhawn ang.