Sabalenka a chak phawt

Cincinnati Masters khelh laiah, hmeichhe tennis world number 1 Aryna Sabalenka chuan nimin khan Marketa Vondrousova chu 7-5, 6-1 in a hneh, a match lehpekah chuan Emma Raducanu a hmachhawn dawn a ni.

Centre Court-a inkhelah, seeded pakhatna Sabalenka hi set hmasa berah chuan a talbuai ve deuh a, mahse set hnuhnung zawkah erawh game khat chiah hloh chungin a chak tlang ta zawk.

Wimbledon hnua a match hmasa ber khel lehtu Sabalenka chuan, "Tun season chhung ringawt pawhin match ka khel tam tawh em em a, chuvangin hetiang inkhel hmachhawn dan hi chu ka thiam tawh. A pawimawh ber chu tihsual neih tlem a ni a, inringtawk taka kan khel thei a nih chuan result pawh a ṭha ṭhin," tiin a sawi.

Inkhel dangah Emma Raducanu chuan Olga Danilovic chu 6-3, 6-2 in a lo hneh ve bawk - British star hian coach thar Francis Roig enkawlna hnuaia match a khelh hmasak ber a ni a, tun hma lama Rafael Nadal nena lo thawkdun tawh Roig nen chona an hmachhawn dun ang.

US Open champion ni tawh Raducanu chuan, "Tun hnaiah ka khel ṭha ve ṭhin hle mai a, duhthusam ang vek chu ni lo mah se lawmna tur lam a tam zawk, chuvangin beiseina nen hmalam ka thlir ang," tiin a sawi.

Wimbledon third round-ah Raducanu hian Sabalenka hi a ngam lo, tunah an intawng leh dawn a ni a, amah aia player tawnhriat ngah leh tharum nei tam zawk lakah fimkhur taka a inlan a ngai ang.