Palace-in Europa League an khel dawn lo

FA Cup champion Crystal Palace-in Liverpool hnehin Community Shield an la a, kum 1975-a Derby County hnua Community Shield an khelh hmasak bera he nomawi chawi thei hmasa ber an ni.

Liverpool tan 'season bul ṭanna' nomawi ve mai ni mah se, Palace tan erawh a hlu a, inkhelh zawhah manager Oliver Glasner chuan, "Community Shield leh Europa League khelh hi inthleng ngai ta se, Community Shield ka thlang ang," a ti.

Palace-in hlim takin champion an lawm zui a, an thu hriat zui erawh Europa League an khelh loh tur thu a ni. London club hi FA Cup champion vanga Europa League khel tur an ni a, mahse, buaina a thleng.

Club neitu John Textor-a'n Palace ang thoa Europa League khel tur Lyon-ah share a nei a, UEFA danah, club neitu inang tan inelna inangah a inlan theih loh - hetah hian an ram league table-a hniam zawk chu paihchhuah tur an ni.

EPL-a 12-na Palace paihchhuah an ni a, Europa Conference League zawk an khel dawn. Palace hi lungawi loin, khawvel infiamnaa thuneitu sang ber Court of Arbitration for Sport (CAS) hnenah an zualko.

UEFA hian Palace hi March 1, 2025 thleng kha hun an pe a, mahse, Textor hian July thla khan Palace-a a stake 43% hralh tawh mah se, UEFA hun tiam chhungin an tifel hman lo a, CAS chuan UEFA rorel dan chu a dik thu an sawi.

CAS chuan UEFA chuan inkaihhruaina dan fel tak a nei sa a, chutiang taka hmalak a nih avangin sawi buai theih a nih loh thu an sawi. Palace aiah hian ECL khel tura inbuatsaih vek tawh Nottingham Forest chuan Europa League hi an khel thung ang.