Chanmari vawi liah vawi li an chak

Chanmari FC-in I League club an nih hnua an season hmasa berah match li khel tawhin an khingpui an la hneh vek a, Rochhingpuia hote hian match tinah goal khat aia tam an khung vek bawk.

Nimin I Day Football quarterfinal inkhelah Chanmari hian Ramhlun North 3-1 in an hneh a, harsatna tawk loin semifinal an lut. Final khel tur zawnnaah erawh Chanmari hian anmahni ang bawka I League club Aizawl FC an hmachhawn dawn a, Chhinga hoten R-a leh a hote hmaah fiahna a hmachhawn ang.

RG Stadium-a inkhelah Ramhlun North keeper Lalchhanchhuaha Sailo che ṭha a, inkhelh tir lamah Chanmari goal khung tur dang nasa mah se a dang vek seng ta lo. Minute 20-naah KC Malsawmsanga ball pet kawh chu Chhana'n dang perin Michael Lalbiaksanga'n Chanmari goal hmahruai khung nan a hmang.

Minute 30-naah Lalruatsanga'n Chanmari goal hnihna a khung a, Serchhip tlangval goal khung mawi viau mah se vanneih a tel a, a cross ball tura ngaih chu goal-ah kalin Ramhlun North keeper tan dan ngaihna a awm lo.

Chanmari nuam sa taka chak tura ngaih an nih laiin Ramhlun North coach Lalrindika Hmarin halftime chawlh a hmang ṭha a, minute 59-naah Malsawmzela (Valpuia) hmangin siphurh an sut ṭhen.

Ramhlun North-in beiseina thar an nei a, mahse team ṭha zawk Chanmari erawh an chungnung zawk. PC Rosangzuala leh Michael ten khung belh thei lo mah se Aron-a cross ball ṭha chu Ramhlun North defender Vanlalpeka Pautu-in minute 71-naah an lamah a tilut. Chhinga hoten goal khung belh thei lo mah se hnehna chang turin harsatna n tawk lo a, 3-1 in an chak.