Saikhamakawn tan Amuana

I Day Football quarterfinal-a inhnehtawk tura ngaih Saikhamakawn leh Dinthar te chu rinlawk ang ngeiin a hmuhnawm a, a tawpah Suanngaihmuana kawltu Saikhamakawnin 4-3 in hnehna an chang.

Nimin chawhnu inkhelah hian Saikhamakawn tan Vanlalhruaia'n goal hmahruai a khung hnuah Amuana'n hattrick a siam. Dinthar lam an tlawm duh lo a, Ricky Lalramnghaka, Lalchhanchhuah leh R. Laldanmawia te goal hmangin beiseina insiam mah se a tawp an thleng zo lo.

Nimin inkhel hmuhnawm bika hmuhnawm ber chu Amuana a ni a, Mahruaia hmanga hmaa an hruai hnuah minute sarihnaah Amuana'n hian Dinthar tlarhnung offside trap bumin cool zetin a khung.

Dintharin goal hnih chhuah hma mah se an beidawng lo a, second half-ah Ricky Lalramnghaka penalty leh Lalchhanchhuaha te hmangin siphurh an sut. Saikhamakawn an talbuai hmanin Amuana a rawn inlar leh a, Kiran Chettri hnen aṭanga a ball hmuh chu Bethlehem Vengthlang tlangval hian ṭha zetin a khung.

Amuana'n Dinthar tlarhnung a tibuai a, defender H. Malsawmdawngkima'n box chhungah Saikhamakawn striker hi a titluin penalty a chawi. Minute 78-naah Amuana hian a penalty hlawhchhuah hi goal-ah chantir a, hattrick a siam bakah dinhmun ṭhaah Saikhamakawn a dah.

Mahse, 4-2 a nih hnuah pawh Dinthar an beidawng duh lo a, keeper RS Lallawmzuala che ṭha viau mah se hun tawp hma chiahin Danmawia corner pet a dang thei lo. Saikhamakawn 4-3 in an chak a, Amuana chu danglamna thlentu a ni.