Zaninah CYMA Futsal Quarterfinal

LBS Suzuki 1st Inter Branch YMA Futsal Tournament 2025 quarterfinal chu zanin hian R. Dengṭhuama Stadium, Mualpuiah khelh a ni dawn. Zanin dar 6:00-ah Bawngkawn leh Muthi an inkhel ang a, dar 7:30-ah Zonuam leh Electric Veng te an inkhel chhunzawm ang.

Bawngkawn hi an veng tlangval F. Lalrozama hoin training an nei ṭha a, tawnhriat nei ṭha H. Lalmuankima a la ho bakah Lalpekhlua leh Lawmnasangzuala ten theihna an neihsan avangin beiseina pawh an nei sang. Mahse, an khingpui tur Muthi hi futsal-ah chuan an khawng ve tlat. Edward Lalruatkima leh C. Zomuanpuia te awmna team hian khaw mipui puihna nen Bawngkawn hneh theih an inbeisei ang.

Quarterfinal match hnuhnung zawkah Zonuam leh Electric Veng te an inkhel dawn a, futsal khel thiam veng ve ve an ni a, inkhel hmasa zawk aiin quality pawh a sang zawk dawn. Zonuam hian an khingpui an sawp ve chiam lo a, mahse hun rei tak khel ho tawh an nih avangin an khel a nghet a ṭha.

Electric Veng hian hall an nei ṭha a, Lalhlimpuia'n (Tata) a ho ṭhat bawk avangin futsal thiam ngah ber veng anga chhal ngam an ni. Tun ṭumah pawh hian AIFF Futsal Championship-a best player ni tawh Lalsangkima chhawr thei lo mah se Zonuam hneh turin an la ṭha tawk a, chak tura rinkai zawk pawh an ni. Chutihrualin zanin inkhel turte hi an intluk tawk avangin mipuiin danglamna an thlen thei a, entu neih ṭhat a pawimawh dawn.

Inkhel en man hi Rs 50 a ni a, Central YMA YouTube hmangin a en theih bawk.