I Day Veteran Football : Ramhlun United-in G90's an barakhaih

I Day Veteran Football-ah inbuatsaihna nei ṭha Ramhlun United Veteran-in team ṭha G90's Mizoram 1-0 a hnehin final an lut a, semifinal inkhel hnuhnung zawkah Ditea's FC-in Electric Veng Veteran 4-0 in an sawp.

Nimina Chite Playground-a inkhelah G90's Mizoram-in Ramhlun United an zuam sual a, minute 49-naah Vanlalthara Khiangte-in Ramhlun United tana khungin G90's in an chhanletna an nei lo. Inkhel hnuhnung zawkah squad chhah ṭha Ditea's FC-in Jerry Zirsanga leh KC Lalthlenghluna te hmanga goal an khung hma avangin nuam sain an chak a, second half-ah Jerry leh Lalthanpuia ten khung belhin 4-0 in an chak.

Veteran Football final hi August 15, Zirtawpni tlai dar 3:00 hian RG Stadium-ah khelh a ni dawn a, Chite Playground aia a len dawn avangin inkhelh kalhmang pawh a danglam thei hial ang.