Kanan FC-in semifinal an thleng

Kanan FC-in I Day Football semifinal lut turin nimin khan First Division club Tuithiang FC 1-0 in an hneh a, Chawnthansanga enkawl Kanan hian Lalsangzuala Hmar kaihhruai Saikhamakawn nen final khel tur an zawng ang. Dinthar an chak zawh tak loh avangin Aizawl West Derby thleng turin Mizoram Premier League nghah phawt a ṭul dawn.

Nimin inkhelah Kanan FC-in bul a ṭan ṭha a, left back Lalrochama'n minute 10-naah goal awmchhun a khung. Chawnga kahhruai Kanan hian tun inelnaah goal an la chhuah lo a, an khingpuite hneh vekin semifinal an lut.

Kanan hian group stage-ah MPL club pahnih SYS FC leh Mizoram Police bakah First Division club Ramhlun North te an hneh a, goal riat khungin goal an chhuah lo. Chawnga hote hian Tuithiang lakah goal an khung hma a, an khelh tawhna thlirin awlsam taka chak tura beisei ni mah se 1-0 in an chak hram.

Tuithiang hian second half-ah si phurh sut ngei tumin na takin Kanan an nawr let a, Lalrinpuia leh Lalbiakhlua te goal hmaah an hlauhawm ṭhin hle. Goal la chhuah lo Kanan tlarhnung phui tawk lo mah se keeper R. Malsawmkima (Mana) a che ṭha a, Tuithiangin goal an chhuah lo.

Mana hi nikum I Day Football-a Mizoram Police champion puitu keeper kha a ni a, tun ṭumah hian Kanan tan khelin a teammate F. Lallawmkima nen kum zawna champion theihna hun ṭha an nei an ni.