Swiatek leh Gauff an tlang

ATP-WTA Cincinnati Open khelh laiah, champion tura rinkai Iga Swiatek chu a khingpui tur a inlan loh avangin inkhelh hah ngai loin chaka puan a ni, player ṭha dang Coco Gauff erawhin match pangngai khelin hnehna a chang.

Grand Slam vawi ruk champion tawh Swiatek hi Marta Kostyuk nena intum tur an ni, mahse Kostyuk hi a banrek ding lam hliam vangin a inkhel thei lo, seeded pathumna Swiatek hian an match lehpek atan thahrui a khek thei tihna a ni.

French Open champion Coco Gauff erawhin match a khel, a khingpui Wang Xinyu chu 6-3, 6-2 a hnehin second round a paltlang a, a tir lamah inkhel tawk viau mah se a rei hnuah Gauff a chungnung ta hle.

American nula Gauff hian kum 2023 khan Cincinnati Open nomawi a chawi, a hnuah inelna lian OS Open champion a ni leh thei bawk, tun hma lama ropui taka kum tawp lam hun a hman tawh ang kha kuminah a beisei leh mek a ni.

Seeded pahnihna Gauff chuan, "Darkar khat leh minute 11 chhung kan inkhel a, kan hun hman dan chhut chuan set hnih awlsam tak chu a ni lem lo," a ti, a match lehpekah chuan Dayana Yastremska a hmachhawn leh ang.

Inkhel dangah seeded pathumna Jessica Pegula chuan Kimberly Birrell 6-4, 6-3 in a hneh. Season hmasa khan Pegula hian final a lut a, mahse a hmawr bawknaah Aryna Sabalenka a hneh lo, kuminah pawh thleng sang leh tura rinkai a ni.

Season hmasa French Open leh Wimbledon final khel phak Jasmine Paolini pawh a chak - seeded pasarihna Paolini hian Greek nula Maria Sakkari chu 7-6 (7/2), 7-6 (7/5) a hnehin a tlang bawk. French Open 2017 champion Jelena Ostapenko chu a khingpui tur Camila Osorio a inhliam avangin a tlang bawk.