Amahin Isak-a a training

Alexander Isak chuan team training a la zawm lo - mimal training erawh a nei. Isak hian Newcastle United a chhuahsan emaw, a chhuak lo emaw pawh ni se la Premier League season ṭan niah chuan a inkhelh ve a rinawm tawh loh a ni.

Kum 25 mi Isak hian Magpies chhuahsan ngei a duh a, a duh thu langsar tak pawhin a sawi - Premier League champion Liverpool nen pawh an indawr tawh, mahse a man chungchangah inremna a la awm mai thei lo.

Newcastle manager Eddie Howe chuan, "Isak dinhmun hi zawhna kan dawng hnem a, kan sawi ho fo tawh bawk. Tuna ka sawi theih chinah chuan, season ṭan huna kan match hmasa ber atan chuan kan la telh ve thei dawn lo a ni.

"Tuna kan boruak hian eng chen nge a daih dawn chu ka hre lo, a pawimawh zawk chu team hi a ni. Mimal buain aia chuan team buai neih a ṭha lo zawk, chuvangin a lungawi leh theihtawp chhuah tute kan dah pawimawh a ngai," tiin a sawi.

Season hmasa khan Isak hian inelna hrang hrangah Magpies tan match 42 a khelh aṭangin goal 27 a khung a, a khel ṭha takzet. League Cup final-a Liverpool an hneh ṭum pawhin goal a khung, kum 70 hnuah Newcastle hian nomawi an chawi ve leh chiah.

Newcastle United hian season thar inbuatsaihna match an khelh tur chin an khel zo tawh - Inrinni tlai dar 5:00 hian a bul ṭan nan Aston Villa an lenchilh dawn a, inkhel hautak a ni nghal ang.