Everton leh Grealish indawr

Premier League club Everton chuan Jack Grealish lakluh an tum mek - Manchester City forward hi season khat chhung loan hmanga hawh an tum a, indawrna pawh a kal thui tawh hle, an inrem dawn niin a lang.

Kum 29 mi Grealish hian Aston Villa aṭanga Man City a pan hnuah player pawimawh a ni ṭhin, mahse hliamin a tihbuai bakah khelmual pawn lamah boruak dang a nei zauh ṭhin a, season hmasa kha chuan an chhawr ṭha duh tawh lo a ni.

Pep Guardiola-a'n season hmasa khan Premier League match pasarihah chuah bul a ṭantir a, hmanni lawka khelh zawh tak Club World Cup-ah phei chuan inkhel turin a hruai ve tawh lo.

Everton hian Grealish hi an la thei a nih pawhin EPL an match hmasa berah chuan an chhawr hman a rinawm tawh loh a ni. David Moyes-a naute hian August 18, Thawhṭanni zanlaiah kai thar Leeds United an lenchilh ang.