LBS Suzuki CYMA Futsal : Sihphir Venghlun Vs Tuikual N; Ramthlun VT Vs Dinthar

LBS Suzuki 1st Inter Branch YMA Futsal Tournament-ah zanin hian R. Dengṭhuama Stadium, Mualpuiah quarterfinal match hnih khelh a ni dawn. Zanin dar 6:00-ah Sihphir Venghlun leh Tuikual North te an inkhel ang a, dar 8:00-ah Dinthar leh Ramhlun Vengthar te an inkhel ang.

Team pali inlan turte hi futsal khel thiam veng vek an ni a, chak tur pawh hriatthiam a har tawh. Inkhel hi Central YMA YouTube Channel-ah a en theih a, a hmuna inkhel en man hi Rs 50 chauh a ni. Futsal inelnaah mipui an pawimawh a, entu neih ṭhat a pawimawh dawn.

Tu nge huai zawk?

Sihphir Venghlun hian D. Buanga & Son's Inter VC Futsal Tournament 2023-ah nomawi an lo chawi tawh a, veng/khua inelnaa futsal champion tawh an nih avangin an thawm a ring dawn. Hei chauh hi a ni lo a, football inelna LPS Cup 2024-ah nomawi an chawi tawh bawk.

LPS Cup nomawi an chawi khan RG Stadium mawi tham mipui an pungkhawm a, an tum phawt chuan a bul lawk R. Dengṭhuama Stadium khat inṭuk khawm thei tur an ni. Mipui tiphur thei tur khawp player an nei a; PC Lalruatfela'n a chakpui chhoh hnuah PC Lalruatsanga dam tawh a, Tuikual North aia ṭha zawkah an inngai ang.

Mahse, Tuikual North hi futsal inelna chuan an nep bik hauh lo. Kumin khan BR Studio MFA Futsal Division I-ah an veng club Go FC chuan Electric Veng 5-3 a hnehin an champion a, boruak sang an ngam riau.

Tuikual North hian quarterfinal kalkawngah an huaisen zia an lantir a, Tuikual Derby-ah pawh 5-4 a chakin a huai zawk an ni. Team ṭha Leitan an hneh leh bawk avangin inrintawkna an ngah sawt dawn. Amos Zorinsanga ke a hmui ṭha a, veng mipuiin an ṭawiawm bawk chuan champion nomawi hi Tuikual North lamah an hawn thei tlat.

Dinthar Vs Ramhlun VT

Dinthar hi football-ah chauh sulhnu an nei ṭha lo a, futsal inelna pawh uar hmasa niin Lalmalsawma Memorial Futsal MFA Inter Village Futsal Tournament 2020 khan Zonuam hnehin an champion daih tawh. Final-a hattrick siamtu leh best player Samuel Laltlanthanga'n tun ṭumah hian la telpuiin nomawi chawi beiseina an nei lian hle.

MPL champion hmasa ber ni thei Dinthar hian futsal club pawh an nei ṭha a, tun ṭum inelnaa an chet ṭhat chhan pakhat pawh hi a ni. Quarterfinal lut turin football lama an hmelma Chanmari 6-2 in an sawp a, hei hi nomawi chawi hmaaa lawman hmasa a ni ang. Chanmari an hneh hma hian Dinthar hian football khel thiam veng Armed Veng leh Ramhlun South te an hneh tawh bawk.

Mahse, zanina Dinthar hmachhawn tur erawh futsal khel thiam Ramhlun Vengthar an ni a, inkhel hmuhnawm a besei theih ang. Ramhlun Vengthar hian Falkland (4-0), Chhinga Veng (3-1), Bungkawn (4-2) leh Nisapui (4-3) ten an hneh a, hnehna an chan theih nan Lalremtluanga leh Zomuanpuia te an che ṭha ṭhin. Zaninah pawh an che ṭhat leh a ṭul dawn.